WOJKN

Schaugst aa so gern an Himme nauf,

wann er schee blau is oda rot

bein Sonnauntagang? - Pass auf,

dass d fei ned stojpast,* sonst bist tot,

wanns d auf Kopf fojst, oda s Gnack

dia brichst, des waar scho recht fatal!

Wos? – Du bist no recht guad auf Zack?

Do gratulier i, und glei recht formal…

Jazt schaug de scheena Wojkn o -

so gejb und schee blau hintalegt…

Und broat de Flügl aus glei no –

fliag nauf, sei ned so aufgeregt,

dann hejft dir Gott in Himme nauf ,

wanns d vo da Liab aa wos vastehst…

Falls d oba fojst, kimmst nimma nauf –

es sei denn, du bist sattlfest…