WO KIMM I HER ?

Da Willi – Erstklassler a Woch

(vom Kindagoartn endli draußt),

hat scho a guade Frog iatzt doch -

und frogt an Bappa, ganz dazaust:

„Du, Bappa, sog – wo kimm i her?“

Iatzt is s so weit – o mei, o mei…

De Frog, de is für mi a Gscher*-

Wia bring i eahm des iatzat bei?

„Des is – ääh – scho weng kompliziert –

I glaub, de Mamma konn s erklärn…

Muaß schaugn, das s Auto fahrad wird,

dass wieda gscheid mobil mia wer(d)n!“

De Mamma nimmt si Zeit iatzt gnua

und bringt eahm ojss recht liabvoj bei…

Sie frogt dann: „Sog moj, liaba Bua –

wia kimmst grod iatzt auf d Frog?“ „Ja, mei,

mia ham an Neichn in da Schuhj,

der sogt, er kaam vo Hamburg her.

Ganz kloar, dass i iatzt wissen wuj,

wo i her kimm – i woaß ned mehr!“…

*Schererei                                                     P.U. 05.11.18