d Schuj* is aus...

Wann an da Schuj vabei ma geht,

wann s aus is: – Mei, is des a Gschroa!

Do plärrn oa, wia a Schwerathlet…

S werd oana umbrocht, wia i moa?**

Und aufm Vorplatz stehngan glei

poar Dutznd Auto – kreiz und quer…

I frog mi scho: Ja, derf des sei?

Wo kemman so vuj Autos her?

Aha – des san de Müatta, de

ihr Kind ja obhojn miassn – mei…

De kennan olle nimma geh –

des muaß a schwaare Grangat° sei!

I woaß ja, wia s bei uns no woar:

Drei Kilometa woarn s in d Schuj.

Mia samma z Fuaß ganga, ganz kloar!

Dass heit koana mehr z Fuaß geh wuj?

Guad – ab da viertn Klass hob i

a neichs, greans Radl dann scho kriagt.

I bin damit ganz langsam gfoahrn,

auf dass mi ja a jeda siahgt.

Mia ham aa goar koa Auto ghabt –

heit ham s in jedn Haus oft drei!

A Schujbus – ja, wann draußt vom Land

in d Stodt de Schüla miassn rei…

Der is recht voj, i hob s scho gspannt -

mecht ned do mit foahrn – mei, o mei!

*Schule     **meine, denke                °Krankheit                   P.U. 03.04.19