Frühlingsgefühle und Corona

Es is wieda, wia letzt’s Joahr aa:
Scheens Weda gibt’s auf Ostern – guad!
Corona macht hojt „Tralala*:
Kontaktverbot! – Do kriagst a Wuat!

De Nachbarin ned bussln derfst
(dei Wei hätt eh ja wos dagegn),
weils D aa an Nachboarn sauba nervst
wann si do wo Gefühle regn…

„Naa, naa, Mo – naa, des werd fei nix!
So weit geht hojt da Frühling ned!“
Da Nachboar schimpft aa glei: „Zefix!“
Scho, weil Corona dagegn steht.

Und außerdem hast a scheens Wei
ja sejba, brauchst koa andre ned!
Des gaab bestimmt ja Ärga glei,
drum sei vanünftig und ned bled!

Gfrei di am Blüahn vo da Natur,
dass wieda wärma werd und schee
(ojss ander gaab bloß Dingsdo pur)-
na werd s glei wieda bessa geh…

Sonst fojt zun Frühling mir nix ei…
Werd doch ned Früahjoahrs-miad jatzt sei?!

*svw: drumherum P.U. 30.03.21