Ka Gwand und ka Göd, so kimmt ma auf d´Wöd.
Kann Willn , kann Verstand, so is ma beinand.
Und d´Muatta voll Sorgen, obst va heut bis auf morgen
mitn Leben kimmst davon.-Siagst, so fangt da Mensch on.
Kannst net geh`n und net steh´n, kimt da Hunger, tuast flenn`,
loßt es rinnen wias kimt, ob vorn oder hint´.
Kriagst an Sutzl ins Mäu, daß´d net plärrst allewäu.
Erst a poar Monat drauf, do rappelst di auf
und bevor´s dich datappen, liegst a schon auf da Pappn.
Mit wiwi und gaga, mit gugu und tscha tscha
fangst du dann an zan Redn. S´is wichtig für´s Leb´n.
Du lernst oiweu mehr, oba lang geht´s hoit her.
Lernst wos grod is und echt und wos falsch is und schlecht.
Host de ois hinter dir und bist g´wochsn ois wia,
dann erst hebt dös Leb´n an. Suachst an Partner dir dann,
glaubst jetzt bist du geborgen, kommen neuerlich d´Sorgen.
San Kinder bald do und bussln di o,
wochsn her wia die Ruam, ob Madln , ob Buam.
Und vü z´schnö kimt die Zeit, wo die Kinder so weit.
Bald wern weiß deine Hoar,host schon Enkerl a poar.
Es zittern schon d´Händ, im Mund kane Zähnd.
A die Kroft loßt schon noch und da Wille wird schwoch.
Jo, waun´s dir bestimmt, wirst du wieder zum Kind.
Vorbei is da G´spoaß.
Und so schliaßt sich da Kroas.