Nu kummst du

Annerletzt wär ik jo op't Finanzamt. Worr nu jo ok allerheuchste Tied, tweemol harrn se mi jo all opfordert mien Stüerverklorn afftogeven.

Ik harr mi nu jo all mit'n Hupen Formuloren indeckt un denn kunn dat Utfülln nu jo losgahn. Dat eerste wär dat "Allgemeine". Klor, dor keem de Nomen un mien Anschrift rin. Un ob ik in'ne  Kark bün un in wat för een, wull'n se weeten. Nä, bin ik jo nu nich; sodennig wär dütt Blatt denn jo klor. Op dat neegste wär denn jo dat Inkomen intodregen. Dor stunn"Arbeitslohn aus nichtselständiger Arbeit". Tjä, ik bün nu jo Rentner un heff gor keen "Arbeitslohn". Ach, kiek hier, in de Gebruuksanwiesen steiht: "Als Rentner benutzen Sie Anlage "R". Jo klor, dor steiht jo ok 1. Rente un 2. Rente. An'ne eerste Steed droog ik denn jo mien stootliche Rente in un an'ne tweete Steed, mien Bedriefsrente - dat wär nu jo all'ns klor för mi. Wat se denn aver noch all'ns weeten wulln, hätt mi meist rammdösig mokt. Naja, so üm un bi dree Stunn's Tied wär ik denn jo fardig - fix un fardig.

Annern Dag, ik nu jo op Finanzamt. Na ne halve Stünn Söken, harr ik denn jo de för mi tostännige Stuuv funn'n. De junge Mann de dor in seet, seeg gor nich na'n Beamten ut; he harr gor keen Hoor mehr, he harr ne Glatze - "de Fiskus fritt di de Hoor vun'n Kopp", ward jo ok seggt - un in't linke Ohr harr he'n Ohrsteeker, so as de Deerns dat hebbt. Ik wull em glieks wat to mien Brutto-Inkomen verkloren. Nä, ik schull mi man setten, he hett'n Afflop-Plon un dorno geiht dat hier un sünst nix. Naja, wenn dat so ist. Kiek, he is jo doch een echten Beamten. Woso denn mien Inkomen nich ünner "Arbeitslohn" indreegen weer, frög he mi. "Tja", segg ik, "ik bün jo Rentner un dor heff ik dat jo ok in dat Formulor "R" för Rentner un bi "Renten" indrogen", anter ik. "Da gehört es aber nicht hin", seggt he, "die Rente gehört unter "Arbeitslohn aus nichtselbständiger Arbeit", wies he mi torecht. "Aver ik bün doch Rentner, ik arbeid doch nix mehr", versöch ik nochmol. "Das ist egal", he nu wedder, "Rente gehört unter Arbeitslohn - das ist Arbeitslohn ohne Arbeit!" ??? Häää??? Nu kummst du!