Schwammalzeit, Erinnerungen an mein Großvata

 
Manchmoi wenn i ois Kind bsondas brav war und mein Teller leer gessn hob, hod mi mei Großvata, zur Belohnung, mitgnomma in Woid zum Schwammalsuacha. Um Viare in da Friah oft scho, heit daad i song: „Eine menschenunwürdige Zeit“
aba ois Kind is oan do nix z' dumm.

 Mei Großvata hod von olle Leit im Dorf de bestn Schwammalplätz kennt, hams gsogt und dofia is er dann aa scho moi in olla Herrgottsfriah stundenlang bis tief an Woid nei grennt. A bissl unheimlich war mir des ois Kind scho, vorallem wenn's no dunkl war, aba er hod mi dann ganz fest bei da Hand gnomma und nebenbei erzählt was im Woid so olles passiert.

 I hob eahm dann oiwei tausend Lecha in Bauch nei gfrogt und er hod a oiwei a richtige Antwort drauf parat ghabt.
Wo kommt da Tau im Gros her und warum spinnt de Spinna und wenn
de Sonna am Himme untageht, wo geht de dann do hie.
Wo schlafan de Vegl bei da Nacht, und wos machan de Baam und wo denn de Viecha und de Schwammal im Winta so san?“.
Von de Raiba, de bäsn Hexn, von de Zwergal und de guadn Feen und i hob de dann olle mit meine Kindaaugn, hinta jedn Baam gseng.

 Üba so manche Himmbeerstaudn, de Bachal und de umgfoina Baam hod er mi, mit seina Großvatageduid, imma wieda umedrong und wenn i dann miad worn bin oda an rechtn Hunga verspiaht hob, dann hod da Großvata, wia a Zaubara sein Rucksock auspackt und in dem war dann oiss des drin was a Kindaherz höher schlong laßt. Alloa scho des wos do oiss in dem Rucksock drin war, war des friahe Aufsteh und de Schindarei vom ganzn Dog wert.

Nur Oans, des woaß i no wia heit, hod da Großvata ums varecka ned meng, wenn i ned aufpaßt hob und bin auf de Schwammal nauf gstiegn.

 Manchmoi wenn i heit zur Sommerzeit in Woid naus fahr und übaroi riachts nach Schwammal, dann denk i oiwei no gern an de Zeit z' ruck und wia des domois ois Kind mim Großvata so war.

 Ja und gibt’s amoi des Lebn noch 'm Tod im Himme ned, dann werd mei Großvata, auf jedn Foi, a in meina Erinnerung und de Gschichtn weita lebn die i heit meine Enklkinda erzähl.

Wer woaß denn des scho, vielleicht is ja aa genau des domit gmoint wenn mia
- vom Weitalebn noch dem Tod – redn, mia de koa Ahnung davo ham wos dann amoi sei werd.

Ingrid Höft
Juli 2011

• Autorensteckbrief (Infos & weitere Beiträge)
• gisa-omahotmail.de (Spam-Schutz - Bitte eMail-Adresse per Hand eintippen!)

  Ingrid Höft als Lieblingsautorin markieren

Diesen Beitrag empfehlen:

Mit eigenem Mail-Programm empfehlen