Wia gehts da?

 
Du wirst gfrogt wias da geht?
Passt eh ois,
waa de Antwort, wannst nix dazua sogn wüsst.
 
Mei mir gehts schlecht, wannst sogst
do bringst dei Gegenüba in Valegenheit,
vielleicht wü a des goar ned wissen.
 
De Gegenfrog: „Wia gehts den diar?“
is oiwei guad,
do schupfst den Boill zum Antworten ume.
 
Kunnst a sogn: „Miar gehts guad“
des gfreit dei Gegenüba und is zfriedn.
 
Wannst sogst: „Ih brauchat dei Hüf“
kunnts sei das dei Gegenüba dann schnö weg muass.
 
Kunnt owa ois ganz anders sei,
a wirklicha Freind wann a is,  foillt ma ei,
jeda is fiarn andern do
und so san ma uns oiwei noh.