Mei oids Kanapee

Mei Kanapee bringt mi boid um!

Seit Jahren lieg i jetzt drauf rum

und s' Gstej* duad jedsmoi greislig weh

drom auf mein oidn Kanapee.

Und des is nimma ganz des jinga,

i soits scho lang zum Sperrmüll bringa,

doch irgendwie do häng i dro,

aa Übableibsl von mein Mo.

Der hod des bei IKEA bstejt,

glei domois von seim erstn Gejd,

des er vadient hod, noch da Lehr

und des is scho a Zeitlang her.

Ois Mitgift wars ma dann aa recht,

des Kanapee war ja ned schlecht

und irgendwann, mia ham uns trennt,

hod er des Kanapee mia gschenkt.

Und seitdem steht des oide Drumm,

jetzt scho in meina Wohnung rum

und miaßt i des jetzt außeschmeißn

dann daads mia gwieß des Herz zareissn.

Dem Kanapee, dem geht’s wia mia

a bisse klapprig, irgendwia

und i, i daad mi schee bedankn

daad i deszweng am Sperrmüll landn.

 Ingrid Höft
Juni 2011

Gstej = Gestell

Wollte noch schnell mein Gedicht Nr.100 ins Forum stellen