Katastrophenjournalismus

Markige Ausdrücke – angelehnt bei Bastian Sick (;-)) 29

Wann auf da Wejt wos Schlimms passiert,

na schreibm de Zeitunga extrem:

Bein Erdbebm fojn de Häusa zamm,

wia Kartnhäusa – des soj s gebm !

Und wann da Sturm a „Twister“* is,

der schleidat d Lastwägn durch de Luft…

Zwoatausnd-drei (s Joahrhundat grod

drei Joahr oijd – ham se – ausgebufft –

von ra „Joahrhundat-Flut“ scho gschriebm.

Und Schwerfoahrzeig gibt’s aa ojwej:

Ojs „Feiawojzn“ san s uns bliebm…

Und vuj Leit wer(d)n evakuiert**!

Des hoaßt ja „leer gmacht“, wia ma woaß…

Mit Häusa konn ma des wohj doa –

Mit Leit? - Do werd s mia wirkli hoaß !

„Humanitäre“ Katastroph“:

Des hoaßt doch – wann i s recht vasteh –

ja - wohltätig? – Mei, oda ned?

Wia konn a Katastroph so geh?

I find so Ausdrück manchmoj bled !

*Wirbler, Dreher     **von Vacuum              P.U. 22.08.18 Bild dpa