66 Jahre

...Ich hab dieses Gedicht absichtich nicht zu Heideli`s GT reingestellt, weil es zu allgemein gefasst ist. Heide hat von mit auf direktem Weg ihr GT-Verslein bekommen...
 
Der Udo Jürgens hat es ja schon gesanglich propagiert: …mit 66 ist noch lange nicht Schluss…
 
Da Udo Jürgens hat scho recht :
Mit sechsasechzg geht s`Lebm erst o…
Grod: `S geht oft nimma, wia ma mecht:
Doch lass ned aus und bleib fest dro!
 
Da Udo ziagt an Bauch fest ei,
fönt `s Hoar, so wia in friahre Dog…
Kauft Lederdress und Bike aa  glei …
I woaß ned, ob i des aa mog…
 
Francisco? - Do a  Rheumakur?
I glaub, do mecht i aa ned lebm
Vo Erdbe(b)m hört ma ja grod gnua;
aa Hippies soi´s  koane mehr gebm…
 
Mit Oma geh i  oida  Mo
zum Rocken ned in Discothek.
Do is ma oafach  z´laut, woaßt scho!
…Mir wandern so - am Höhenweg.
 
Mia woinn auf koa Foi übatreibm:
Mit sechsasechzg is bessa, mia
doan oiwei schee am Teppich bleibm,
sonst schmerzt´s im Kreiz und aa im Knia!
 
Grod schee is´s:  Iatzt, im Ruhestand
do hamma Zeit, g´spoart hamma  aa…
San eingli no recht guad  bei´nand,
iatzt roas ma fort:  Nach Afríka,
 
ans Nordkap und auf de Kanar´n,
Nach Mexiko und  Singapur…
Mei – wann ma grod scha dortn waarn!
Mia machan iatzt oan auf „Kultur“!
 
A bissl  Fitness  - bloß  ned z´vej,
`weng Nordisch Walking no dazua,
na baut ma  aa  ned ob so schnej
und zwischndurch - a  Wellness Kur.
 
Auf d`Nacht a  Glasal  rotn  Wei`
De Hauptsach is, ma bleibt aa gsund!
So derft´s de nächstn zwanzg Joahr sei`…
Zum Jamman gaab’s dann goar koan Grund!

Servus der Paul