Eihoazn*

Wann s draußtn koit is worn, hob i
an Ofa oghoazt – domois no –
und glei is woarm gwen in da Stubm
und gmiatli knackt hats sowieso…
 
Im Summa hob i s Hojz scho klobm**
und sauba aufgschlicht unta m Doch…
Beim Einatrogn oft wos valoarn –
ned schlimm, da kehrt ma oafach noch.
 
Dann samma umzogn in a Haus -
Zentralheizung hats do scho ghod:
Drahst d Heizkörpa ganz oafach auf,
hat nix mehr knistat, knackt. Mei, schod!
 
Koa Dreck woar mer! – A diamoj*** hojt
an Heizkörpa moi obgstaubt und
an Tank mit Heizöl aufgfüllt grod,
doch d Luft woar trucka – ned so gsund!
 
Jatzt wohn ma in r am Neibau, mit
na Fuaußbo’nheizung - und de hat
de Wärm direkt vo untn, do
hast woarme Fiaß, an Thermostat…
 
Doch dauat s ewig, wannst as brauchst,
bis woarm wird. Staub hast ziemli vuj…
Mei Wei, de wischt an ganzn Dog:
Oktoba, nei bis in Apruj…
 
* Einheizen   ** gespalten   *** gelegentlich         P.U.  24.10.14