Hoffnung

A winzigs Baamal bin i erst…
Muaß zuagebm: Guad is der Plotz ned,
wo i do steh – in Gegnteil –
wo mei Sam higfojn is - scho bled !
 
Am Parkplotz von ran Supamoarkt,
an dem Kanojgitta* – oh mei !
Wann i ned stör, an hoj(b)m Meta
werd i do in zwoa Joar wohj sei…
 
Vielleicht reisst mi dann ebba aus,
der mi dann in sein Goartn bringt
und wieda eisetzt?... – Eha ned,
der Plotz iss, der mia sauba stinkt…
 
Wos mi ned tröst: Bei Menschn is s
so manches Moi genauso schlecht:
D Umgebung macht, ob s d Chacn** host.
Ojs Mensch: mei Chanc waar bessa. – Echt!
 
* Kanalgitter     ** Chancen              P.U.  28.06.16