Klassiker auf Boarisch

An Klassiker ins Boarische
zun übasetzn is fei schwaar!
Si vorstejn, Schiller oda goar
da Goethe, dass a Bayer waar?
Da Willi Busch und wer aa sunst
auf Boarisch – Ja, is scho a Kunst!
 
De Schwierigkeit liegt do drin, dass
de Herrn ganz andre Ausdrück hamm
ois wia mia Bayern – hochdeitsch hoit –
drum reimt ma  ganz wos andas zamm.
Doch d Gschicht muaß ja de sejbe bleibm,
trotzdem gibt´s  ganz an andan Reim!
 
As Thema, des steht oiso fest…
Da Klassiker hat´s  vorgebm, drum
muaß aa de Pointe gleich bleibm - und
des nochbaun – mei, do legst di krumm!
Vo wegn Plagiat und so…
A Kunst is´s, wann des oana ko!
 
            ---- ……… ----
 
Mecht wissen, wos da Schiller daad,
wann er mi  z´ übasetzn hatt !