Wonnemonat (2)

                                 mund-art sonett

Warum da Mai da Wonnemonat is,
des hob  ojs Kind i wirkli oft mi gfogt -
und d Mamma hat mia jeds Moj dazua gsogt:
"I hob jatzt lang gnua scho de Wärm’ vamisst,
 
drum moan i doch, dass  Wonne d Wärm hojt is.
De kurzn Dog, ja und de lange Nocht,
de ham oft Depressiona mir scho brocht,
da Winta hat mia meistns Angst gmacht, gwieß!
 
Da Auswärts aba, der bringt wieda d Wärm
und Bleame kemman, pfundig - und i schwärm.
Und seit Novemba hob i ghofft, s werd  Mai,
 
d Natur wacht wieda auf, de scheenste Zeit -
weil d Lebenslust brennt wieda in de Leit…
- Und jeds Joahr bin i wieda mit dabei !"
 
                                                               P.U.  09.05.15