Muadda

So an de erstn drei-vier Joahr
konn i mi ned erinnan, kloar,
weil z kloa i - und Baby woar -
(wer woaß denn no sein erstn Schroa?).
 
Hast ghutscht mi, gwindlt, gwaschn aa,
du hast mia beibrocht boid as Re(d)n,
mi busslt, gwaglt*, gfiahrt und trogn,
bist manchmoi streng aa mit mia gwen…
 
Hast tröst mi, wann i gwoant hob und
mit mia aa ganz oft gscherzt und glacht,
mi zu dir gnomma und vawöhnt,
wann i mi gfiarcht hob in da Nacht…
 
Mog sei, dass jede Muadda des
genauso macht und oisse duad,
aus Liab – vielleicht is aa Instinkt -
weil - s Kind is hoit ihr Fleisch und Bluat…
 
Ob i dia irgndwann amoi
Revanche gnua gebm ko, woaß i ned...
Hast gwieß vuj mehr no für mi do,  (getan)
ois da in meim Gedichtal steht…
 
*: mit dem Kinderwagen herumgefahren          P.U.  10.05.13